Sharmila-i'n campaign a tan

Irom Sharmila-i chuan nakkum January thlaa Manipur Assembly election neih tur atana a campaign chu a ṭan ta.

Campaign Kick off-ah hian Sharmila-i chuan thu sawiin, a chenna Khurai constituency-ah a ding tur thu leh, sum a hmachhuan ve loh tur thu a sawi. Khurai constituency-ah hian Congress MLA N Bijoy a khing dawn tih sawiin, hnehna chan a beisei hle. Sharmia chuan, "Chief Minister Okram Ibobi Singh chuThoubal assembly constituency-ah ka khing tel dawn a, hnehna chang turin theihtawp ka chhuah dawn a ni" a ti.

Sharmila-i hian state assembly election a hmachhawn zawh hnuah, kum 2019-ah parliamentary election-ah chuh leh turin ruahmanna a siam bawk. Sharmila-i chuan kum 16 chhung zet chawnghei kalpuia a lo do tawh, Armed Forces (Special Powers) Act, 1958, (AFSPA) hlih a nih theih nana beih zui zel chu a tum ber a nih thu sawiin, politics hmanga hnehna chan ngei a beisei tih a sawi a ni. Sharmila-i hian kum 2000 aṭanga AFSPA hlih a nih theih nana chaw nghei a kalpui chu kumin August 9 khan a titawp a ni. Chawnghei a tihtawp avanga sawiselna a dawn te chu a pawm thu sawiin, Sharmila chuan AFSPA hlih a nih theihna turin nasa zawkin a bei zui zel dawn tih a sawi bawk.

Manipur 'Iron Lady' chuan, a duh ber chu chief minister dinhmun luah a, nasa zawka AFSPA hlih a nih theih nana hmalak a ni, a ti. Chawnghei a kalpui chhungin political hruaitu te'n an thlawp ṭha lo niin a sawi. Dodalna tam tak a tawh ṭhin te chu amah ti chaktu an nih thu a sawi bawk. Sharmila-i hian October thla khan party thar People Resurgence and Justice Alliance (PRJA) chu a din a, an party hian state assembly election-ah candidate eng emaw zat an nei dawn tih a lo sawi tawh. PRJA chu AFSPA hlih a nih theih nana hma la tur tur an nih thu a lo sawi tawh bawk a ni. Hetih lai hian BJP hruaitu hlun Nimaichand Luwang chuan, Sharmila-i hi beiin, “Human rights leh politics chu thil hrang hlak a ni" a ti.

Manipur assembly election-ah hian rorel lai Congress party leh Bharatiya Janata Party (BJP) te chu inbei tawk hle tura ngaih an ni a, campaign pawh an kalpui nasa tawh hle. Central-a BJP hruaitu lawk eng emaw zat chuan a khat tawkin Manipur an tlawh reng a, an zingah hian BJP Natioanal party president Amit Shah pawh a tel a ni.