JAC Sadar Hills-te'n NH dan an rel

Manipur-a Joint Action Committee Sadar Hills (JACSH) chuan Chief minister Okram Ibobi Singh-a kaihhruai sorkar-in Sadar Hills chu district puitlinga a hlankai mai loh avangin inkalpawhna kawngpui pawimawh dang turin ruahmanna an siam tih an sawi. A hun tur erawh an tarlang lo a, satte sorkar hmalakna an ngaichang hlek dawn tih an sawi.

JACSH thupuangtu chuan, sorkarin an beisei anga hma a lak chak tawk loh avangin, Imphal-Dima-pur (National High-way 2) leh Imphal-Jiribam (National Highway 37) te chu dan an tum tih a sawi. State sorkar chu a lo intiam tawh ang ngeia district-ah hlangkai thuai tura an phut thu sawiin, chak taka hmalak an duh tih a sawi. NH 2 leh NH 37 te hi Manipur chakkhai lakkhawmna kawngpui pawimawh tak a nih avang-in nghawng a nei lian leh hle dawn niin a lang.

JACSH-te hian a hma pawhin CM Ibobi Singh lakah lungawi lohna an lo lantir tawh a, hma an lak zel tur thu an sawi. Lungawi lohna lantir hian Kangpokpi Autonomous District Council-a Cong-ress MLA 19 te chu kar kalta Zirtawpni khan an nihna aṭangin an bang a, Sadar Hills Democratic Party an din a ni. An kal zel dan tur erawh an la tarlang lo.

Hetih lai hian Novem-ber 1 aṭang khan United Naga Council (UNC)-te chuan state sorkar-in Sadar Hills leh Jiribam-te distict-a hlangkai tura hma a lakna duhlohna lantirin National Hiagway an dang chat. Hei hian mipui nawlpui a nghawng a, nitin mamawh lakluhna kawngpui pawimawh dan a nih avang hian nunphung a khaihlak nasa hle. Oil harsatna avangin All Mani-pur School Students Tranporters’ Association-te chuan chawlh an puang a, school zawng zawng deuh thaw khar a ni bawk. Kar kalta chhung khan oil tanker leh bungraw phur truck ṭhenkhat chu venhimna hnuaiah Imphal hruai thlen an ni a, a tam zawk an la tangkhang a ni. UNC-te'n hun rei tak chhung NH an dang hi Imphal East district-a pawl hrang hrangte chuan an dem thu sawiin, UNC chet dan duh lohna lantir hian Imphal-Ukhrul inkar kawngpui an dang ve leh.

UNC-te chuan Mani-pur sorkarin district-a hlankai a tum Sadar Hills leh Jiribam-te chu Naga-te ram “Naga territory” a ni an ti a, state sorkar hmalakna chu nasa takin an dodal. Hetih lai hian district pek tura tih Sadar Hills mipuite chuan state sorkar chu a lo intiam tawh ang ngeia distrit pui-tlingah hlangkai thuai turin an phut a, nawrh huaihawt an rel ve leh ta a ni. Joint Action Commi-ttee Sadar Hills-te chuan NH dan chu mipui ten an tawrh loh theih dan bera kalpui an tum thu an sawi bawk.