Imphal-ah Sangai Festival hmang mek

Manipur Governor Najma Heptu-llah chuan Thawhṭannni khan, kum tina khualzin te hip nana Manipur Tourism Department-in a buatsaih ṭhin, Sangai Festival chu Bhagyachandra Open Air Theatre, Imphal-ah a hawng.

Sangai Festival hawnnaah hian Japan ambassador to India Kenji Hiramatsu bakah, Myanmar palai eng emaw zat an tel. Heptullah chuan ṭhenawm ram aṭanga festival chhim tura lo kal te chu Loktak lake leh national park a fanpui thu sawiin, an chanchin te chu ngaihnawm an ti hle a ni, a ti. Hmarchhak chu khualzin te tlawh chak hmunah siam a ṭul tih sawiin, ram leilung mawina leh hausakna te chu ṭangkai taka hman thiam a ngai a ni, a ti. Japan Ambassador chuan hmarchhak a dil lian ber Loktak Lake tih hmasawn kawngah puih an inhuam thu a hrilh niin Heptullah chuan a sawi bawk.

Chief Minister Okram Ibobi Singh chuan festival hawnnaah hian thu a sawi bawk a, state chhunga hnam hrang hrangte inkarah inunau-na leh inlungrualna ṭha a awm a ngaih thu a sawi. Inlakhran tuma beitute chu khua leh tui ṭha an nih ngaih loh thu sawiin, mipuite chu heng mite lakah fimkhur tur a duh thu a sawi a, festival chu hnam hrang hrangte inkara inṭhian ṭhatna thlentu ni thei se a duh thu a sawi bawk.

Festival ṭan a nih hma Pathianni khan, festival hmanna tur bulhnaiah bomb vawi thum a puak a, mi pakhat a thih bakah, security mi pathum ten hliam an tuar a ni. Manipur CM chuan he thil thleng hi a dem thu sawiin, festival chawhbuai tumtute chu na taka chhanlet an ni ang, a ti.

Sangai Festival hian November 30 thleng a awh dawn a, Southeast Asian ram eng emaw zat aṭangin entrepreneur ṭhahnem tak tel tura beisei a ni. Sangai Festival hi a tirah chuan Tourism Festival tia sawi ṭhin a ni a, kum 2010 aṭang khan 'Sangai Festival' tia thlak a ni. Festival chhung hian culture, handloom, handicrafts & fine arts, indigenous sports, cuisines & music, eco & adventure sports leh a dang eng emaw zat buatsaih ṭhin a ni.