AP-ah politics buaina avangin sum a nih tur anga hman a ni lo : Rijiju

Union minister of state for Home affairs Kiren Rijiju chuan tun hnai kum hnih chhungin, Arunachal Pradseh-ah politics buaina avangin sorkar laipui aṭanga sum hmuhte hmasawn tak tak nana hman a ni ngai lo niin a sawi.

Union minister Rijiju hian tun hnai khan West Siang district-a Yigi Kaum Upper Primary School-ah golden jubilee a hnanpui a, he thu hi a sawi a ni. Rijiju chuan state chhunga Upper Primary leh Lower Primary School te chu cheng nuai ruk ṭheuh pek an nih tur thu sawiin, Adarsh khua tih changtlunna turin cheng nuai 60 pek an nih tur thu a sawi bawk. Union minister hian Golden Jubilee Hall a hawn bakah, Jubilee puala buatsaih Souvenir a tlangzarh. He hun hi State parliamentary secretary for education Bamang Felix chuan a hmanpui bawk.

Arunachal Pradesh politics buaina hian nghawng a nei lian hle a, kum 2015 khan Chief minister Nabam Tuki chu paihthlak a ni. Congress party chuan thuneihna chang mah se MLA zinga a tam zawk an hel a, chung zinga an hotu chu Khalikho Pul a ni. Pul-a leh MLA dangte hi chief minister lakah helin, Congress party an chhuahsan a, rorel thei loin an awm zui. Hun eng emaw chen an buai hnuah President's Rule puan a ni a, sorkar chu rorel thei loin a awm zui a ni. President's Rule puan sut a nih hnuah sorkar thar a ding a, Congress MLA hel Khalikho Pul chu Chief Minister atan lakluh zui a ni.

Pul-a kaihhruai sorkar din a nih danah hian thil fel lo a awm nia ngaih a ni a, Suprem Court chuan kumin July thla khan Aruanchal-ah hian Congress sorkar din leh turin thupek a chhuah. Thupek chhuah a nih aṭanga reilo teah Pul chu chief minister aṭanga paithlak a ni ve leh a, Congress sorkar a ding zui leh a ni. Congress sorkar paithlak a nih lai a chief minister Nabam Tuki aiawh turin, Pema Khandu chu chief minister a tan lakluh a ni zui bawk. Mahse reilote hnuah Khandu leh MLA 40 chuangte chuan Congress party chhuahsanin, People's Party of Arunachal (PPA) an zawm a, sorkar thar a piang leh a ni.

Arunachal Pradesh-ah hian kum khat pawh tling loah sorkar ding lai ṭum thum ngawt thlak a ni a, chief minister pathum lai an awm hman.