Arunachal : Subansiri Upper Hydroelectric project duh lohna lantir

Arunachal Pradesh-a Upper Subansiri district-ah Nilaini khan Daporijo-a 2,000 MW Subansiri Upper Hydroelectric project thawh tur duh lohna lantir a ni a, project hi sut leh turin sorkar an phut.

Lungawi lohna lantirnaah hian project siam tumin a nghawng tur ram huam chhunga chengte bakah zirlaite an tel a ni. Sorakar laka an lungawi lohna thute aupuiin, Subansiri lui khuah an duh loh thu te, an thlahtute aṭanga an ram lo luah tawh chu zangnadawmna pek dawn vang ngawtin an chhuahsan dawn loh thu te an sawi. Kawng an zawh hnuah DC office kawtah an thu khawm zui leh bawk.

Hetih lai hian chief minister Pema Khandu kaihhruaia Thawhlehnia cabinet meeting neih chuan state chhunga mega hydropower project pasarih thawk tura Joint Venture Companies (JVCs) pahnih siam an remti. Chief Minister Office-in a tarlan danin, Kamala 1720 MW leh Subansiri Upper 1605 MW atan NHPC-Arunachal Green Energy Limited siam a ni ang a; Tato I, Tato II, Heo, Naying, leh Hirong power project atan NEEPCO-Arunachal Hydro Power Corporation Limited din a ni bawk ang. He hmalakna hi Decade of Hydro Power (2025-2035) chhunga power GW 19 siam chhuah tuma an hmalakna tihpuitlinna kawngah a pawimawh dawn tih an sawi. Cabinet meeting hi state sorkarin 'Cabinet Aapke Dwar' (i kawtkaiah cabinet) mission a kalpuina hnuaiah state khawpui Itanagar-ah hmang loin, Changlang district-a Miao-ah neih a ni.