Assam : Cachar district international ramriah khapna thupek tichhuak

Assam-a Cachar district magistrate Mridul Yadav chuan Thawhlehni khan thuchhuah siamin, district huam chhunga India -Bangladesh ramriah pawikhawihna leh dan phal loh bungraw tawlhruk thleng thei laka invenna atan BNSS Section 163 hnuaiah khapna thupek, prohibitory order a ti chhuak.

Thupek tihchhuah hnuaiah hian Surma lui dunga veivah khap a nih bakah, sangha man tura lawng chuan pawh khap a ni. Hei hi dan leh thupek kenkawh a, dan phal loh bungraw tawlhruk leh, Indo-Bangladesh ramria bawng tawlhruk ṭhin tihtawpna tura tih a ni.

Ni tlak hnu leh ni chhuah inkarah district chhunga Indo-Bangladesh ramria veivah khap a ni a, international ramria km nga huam chhunga ni tlak hnu leh ni chhuah inkarah chini, buhfai, wheat, tel, khawnvartui leh chi phurhchhuah pawh a khap bawk. Thil pawimawh bikah chuan Katigorah circle officer-in tualchhung supply official-te hnen aṭanga phalna a neih hnuah a hun leh hmun bika bungrua phurh turteah ngaihnathiamna a pe dawn a, district magistrate leh BSF commandant hnenah phalna lehkha copy chu thawn tur a ni ang.

Thupek hi vantlang himna tura tih niin thla hnih chhung hman a ni dawn a ni. Khapna hian ramri huamchhunga state leh sorkar laipui official duty-te erawh a huam lo thung.