Arunachal Pradesh : Rel inthlunzawmna hmanga state tihhmasawn tum

Arunachal Pradesh chief minister Pema Khandu chuan a kaihhruai sorkarin rel hmanga inthlunzawmna kaltlangin state tihhmasawnna turin nasa taka hma a lak thu a sawi. Naharlagun station chu Amrit Bharat scheme hnuaiah thawm ṭhat mek a ni a, Pasinghat station pawh kumin December hian zawhfel hman tum a ni, a ti.

Chief Minister chuan Pasighat station chu Arunachal Pradesh khawchhak lam tan transport hub pawimawh tak a nih thu sawiin, Siang aṭangin national network a thlunzawm a, bungrua leh passenger veivahna a ti awlsam tih a sawi. Hei bakah Pasighat-Tezu-Parshuram Kund-Rupai rel kawng pawh detailed project report (DPR) peihfel a ni tawh tih a tarlang.

He rel kawng hi hman ṭan a nih hunah chuan tourism a tihmasawn dawn a, Brahmaputra valley corridor-a sumdawnna a tipung dawn tih CM chuan a sawi. Silapathar-Bame-Along (km 96) leh Misamari-Tawang (km 198) rel kawng tur field-level survey pawh hlawhtling taka neih zawh tawh a ni tih sawi bawk. Khandu chuan heng project-te hian inthlunzawmna, economy ṭhanlenna leh mipui tan zin veivah a ti awlsam dawn tih a sawi.

Rel kawng tihhmasawn a nih chuan bungrua leh service inthawn kawnga a puih dawn bakah, tualchhung entrepreneur-te tan hun ṭha a in hawng dawn a, zirna leh healthcare ṭha zawk neih theihna turin leh, hmun hla leh tlawhpawh harsa zawkte tan pawh hun ṭha a inhawng dawn tih Khandu chuan a tarlang.