Meghalaya leh Tripura journalist-ten Karnataka Governor hmu

Meghalaya leh Tripura-a journalist 14, press tour nei mekte chuan Thawhlehni khan Karnataka governor, Thawar Chand Gehlot an hmu. Press Information Bureau (PIB) Karnataka region-a additional director general SG Raveendra leh PIB Bengluru official-te chuan team hi an ṭawiawm a ni.

Governor chuan team-te chu press tour an neih mek tluang taka an neih chhunzawm zel theihna turin duhsakna a hlan. PIB-in programme pawimawh tak a huaihawt chu lawmawm a tih thu sawiin, inhriatthiam tawnna bakah hmasawnna kawnga hmalakna hrang hrang inhrilhtawnna kawngah a pawimawh hle a ni, a ti. Karnataka-a sector hrang hranga hmasawnna hnathawh kalpui mek zingah; infrastructure, zirna, space, industry leh thingtlang tihhmasawn kawnga an hnathawh chipchiar zawka an hmuhpui a beisei thu Governor chuan a lo hrilh bawk.

Gehlot chuan Union Minister of Social Justice and Empowerment nihna a chelh chhung khan Meghalaya chief minister Conrad K Sangma nen inbiakna an lo neih tawh thu a sawi a, thawh hona ṭha tak an lo neih tawhte leh mipui huapzo hmasawnna ngelnghet a awm theihna tura an inpeknate a tarlang. Union Minister a nih laia pianphunga rualban lo, persons with disabilities (PwDs) te tana international standard-a sports stadium an sak mek chungchang sawi langin, project thawhna atana Meghalaya sorkarin ram a pek thu pawh a lo hrilh a ni.

Governor chuan journalist-ten an tlawhna chuan state leh state inkar bakah media leh sorkar institution thawh hona chak zawk a siam thei tih a sawi bawk.