Nagaland : Job quota policy ennawn tur panel din ṭha leh

Nagaland sorkar chuan sorkar hna laknaa reservation policy a siam ennawn turin panel a din ṭha leh. A hmaa panel hming atana Job Reservation Commission tih chu Commission for Review of Reservation tiin a thlak nghal bawk a ni.

Panel hmasaah khan job quota policy in a huam leh hamṭhatna dawng thei hnam pawl aiawhte an tel a; mahse, panel tharah hnam hrang hrangte tana rualkhai tak leh duhsak bik awm loa thutlukna siam a nih theihna atan sorkar official chauh dah an ni tawh thung tih sorkar thupuangtu, K.G. Kenye chuan a sawi. Hei hi hnam panga intelkhawm, Five-Tribe Committee on Review of Reservation Policy (CoRRP) in ngenna an siam bawhzuia an tih a ni bawk.

Kenye chuan panel din tharah hian member panga an awm a, Development Commissioner hlui R. Ramakrishna-a'n a ho dawn tih a sawi. Committee hian job quota policy an hman mek chu zirchiang nghalin, thla ruk chhunga rawtna an neihte sorkara theh lut tura hun pek an ni.

Job quota policy ennawn tura ngenna hi kumin kumtir aṭang khan Ao, Angami, Lotha, Rengma, leh Sumi hnam pawl intelkhawm, CoRRP hian a lo kalpui tawh a ni. Tuna quota policy an hman mek chu kum 1977-a siam a ni a, tuna an state dinhmun leh, Naga hnam hrang hrangte dinhmun nen an inmil tawh lo niin an sawi. Policy an hman mekah hian non-technical leh non-gazetted post-a 25% chu kum 10 atan dah sak an ni a, heng hnam an thlante hi hnam hnufual bik nia an sawite an ni. A hnuah an chanpual atana dah hi 37% ah tipungin, heta ṭang hian Eastern Nagaland biala cheng hnam pasarih tan bik 25% dahin, state chhunga hnam hnufal dang pathum tan 12% dahsak a ni. Job quota reservation in a huam hnam hrang hrangte hi policy siamṭhat phutna hi an dodal thung.