Assam : NTPC leh ACCF-in inremna siam

National Thermal Power Corporation (NTPC), Bongaigaon leh Assam Cancer Care Foundation (ACCF) chuan Kokrajhar district-ah cancer screening project-a thawh dunna tur inremna an siam. An thawh tur hi cancer natna a rang lama hmuh chhuah leh enkawlna a hma thei ang bera pek niin, Assam-a hmun hla leh tlawhpawh harsaa cheng mi sang chuangin an chhawr ṭangkai thei dawn a ni.

Memorandum of Agreement (MoA) chu Inrinni khan ziah a ni a, kum 2024-25-a din a nih aṭanga an thawh dun kum hnihna a ni. Rs nuai 33 fund awmna, project hmang hian khaw hrang hranga mi 81,000 vel hnenah cancer laka invenna leh enkawlna pek tum a ni a, Block Primary Health Center (BPHC) pali leh Health and Wellness Center (HWC) 80 vel hmangin hmun hla taka awmte pawh enkawl an nih theihna tura hmalak a ni ang.

An hmalakna turah hian oral, hnute leh chhul cancer a rang lama hmuh chhuah chu ngaih pawimawh zual a ni dawn a, tualchhung mite zirtirna pe turin awareness leh programme hrang hrang buatsaih tum a ni bawk. Hei bakah damlo enkawl chhunzawm ngaite chuan home-based palliative service hmangin hamṭhatna an nei dawn a ni.

NTPC Bongaigaon project head Arnab Maitra chuan, state puma cancer laka invenna leh enkawl kawnga ACCF hmalakna leh hnathawh chu fakawm a tih thu a sawi. An thawh dunna chu healthcare changtlung leh, a bulṭhut aṭanga inzirtirna leh vantlang mipui thuam chakna tur a nih thu a sawi bawk.