Tripura: Police-in ruihhlo do runpui nei, mi 16 man an ni tawh

Tripura Police chuan central intelligence agency leh narcotics control unit-te nen ṭangkawpin ruihhlo tawlhrukna network tihtawp tumin beihpui an thlak mek a, ni 10 chhungin ruihhlo ṭhahnem tak manin hemi kaihhnawihah mi 16 man an ni tawh bawk tih chief minister Manik Saha chuan Inrinni khan a sawi.

Chief Minister-in official data a tarlanah; ruihhlo do runpui neih hnuah ganja kg 896, khuh damdawi (cough syrup) bottle 90,617, yaba tablet 180 leh, heroin gram 27.78 man a ni tawh tih a sawi. Police-te chuan Narcotics Drugs and Psychotropic Substances (NDPS) Act hnuaiah mi 16 an man tawh bawk a ni.

Saha chuan ṭhalai nun a ṭha lo zawnga nghawng nei nasa tak, ruihhlo do kawngah sorkarin nasa takin hma a la chhunzawm zel dawn tih a sawi. State chu ruihhlo awm lohnaah siam an tum tih tarlangin, Indo-Bangladesh ramria ruihhlo tawlhruk hluar lutuk pawh tihtawp thuai a ni dawn tih a sawi.

Tripura hian Bangladesh nen international ramri an inṭawm a ni. Chief Minister chuan police department chu ramri kaltlanga ruihhlo tawlhru ṭhinte lakah beihpui thlak chhunzawm zel turin a hriattir. Vantlang mipuite chu dan kengkawhtu agency-te thawhpui a, ruihhlo leh a kaihhnawih zuar rinhlelh an awm a nih chuan report turin a chah bawk.