Manipur : Governor-in remna awm theihna atan mipui thawhpuina ngen

Manipur governor Ajay Kumar Bhalla chuan, Pathiannia Manipur Police Raising Day vawi 134-na lawmna, 1st Battalion Manipur Rifles Parade Ground, Imphal-a neihah, remna leh muanna hun rei tak a awm theihna atan khawtlang mipuite ṭangrual turin a ngen a, tualchhunga buaina chhuak lo ringawt chuan remna a thlen dawn lo tih a sawi.

Governor chuan state chhunga buaina chhuakah dan leh thupek kenkawh kawngah police-te'n mawhphurna sang tak an nei tih sawiin, kum 2023-a hnam leh hnam inkara buaina a chhuah ṭan tirh aṭangin mipui venhim kawngah police-te chu dan kengkawhtu pawimawh tak an ni, a ti.

Manipur police hnathawh ṭhatte sawi langin, hel pawl do kawnga an hmalakna, opium chinna tihchhiat leh mipui hamṭhatna tura hmalakna an kalpui dante a tarlang. Bhalla chuan Manipur police-te tan sorkarin infrastructure lamah hmasawnna, advance training leh hamṭhatna a pe dawn tih a sawi bawk.

Director general of police (DGP), Rajiv Singh chuan kum hnih kal ta chhungin Manipur police-te'n harsatna hrang hrang an tawk tih sawiin, tun dinhmunah boruakin ziaawm lam a pan tawh tih a sawi. Police-te chuan tualchhung buaina a chhuah hnua ralthuam rukbo tam zawk an hmuchhuak tawh a, ralthuam 1,078 tun a nih tawh bakah, state hmun hrang hrang aṭangin ralthuam leh a kaihhnawih eng emaw zat man a ni tawh tih a sawi.