Nagaland : Ntangki National Park humhalh turin khaw 37 ṭangrual

Nagaland-a Peren district-a Athibung sub-division hnuaia khaw 37 aiawhte chuan, Ntangki National Park leh a chhehvel ecosystem humhalhna tur resolution an siam. Resolution hi Zirtawpni liam ta khan General Consultative meeting, Athibung Town hall-a neihah an pawm nghal a ni.

Meeting hi Zeliang-Kuki Public Organisation (ZKPO) buatsaih a ni a, thupui atan, 'Community Consultation on Conservation around Ntangki National Park' tih hman a ni. Meeting-ah hian ṭhalai leh hmeichhe pawl aiawh leh civil society pawl member-te an tel a, Kuki Inpi leh Nagaland Zeliang People's Organisation (NZPO) aiawhte pawh an tel.

Khaw hrang hrang aiawhte chuan Ntangki National Park humhalh kawngah Forest department an thlawp dawn tih an sawi a, dan bawhchhetute chunga khauh taka hremna kenkawh pawh an remti bawk. Park-ah hian thing kih, ramsa kah leh sangha man khap a ni. Hei bakah Athibung sub-division huam chhunga luiahte tur, inverter leh battery hman khap a ni bawk. Village Council tinte chuan he dan hman hi an pawm tlang a ni.

Ntangki National Park hi Peren district-a awm a ni a, kum 1993 khan national park-ah puan a ni. Park zau zawng hi km 200 bial vel a tling. Kum 2005 khan Elephant Reserve-ah puan a ni bawk.