Arunachal Pradesh : Ziro Honour Run-ah 600 chuang tel

Arunachal Pradesh-a Lower Subansiri district-a Ziro-ah Pathianni khan Operation Sadbhavana hnuaia Indian Army leh district thuneitute hmalaknain Ziro Honour Run neih a ni a, mipui tel an ṭhahnem hle.

He hun hi kum 1962-a Indo-China War-a sipai huaisente hriatrengna leh chawimawina atana buatsaih a ni a, mi 600 chuang an tel a ni. Mipa, hmeichhia leh naupang thlengin an tel a, sipai eng emaw zat an tel bawk. Intlansiak hi category pathum - km 21, km 10, leh km 5 ah neih niin, segment tinah pakhatna lawmman pek an ni.

Arunachal governor Lt General (Retd) KT Parnaik chu khuallian a ni a, Indian Army leh district thuneitute chu hetiang hun an buatsaih avang hian lawmthu a hrilh. Intlansiak satliah mai ni loin, tuarchhelna, inrin tawnna, inzah tawnna leh ram hmangaihna lantirna a ni, a ti. Hriselna leh mahni inthunun theihna pawimawhzia sawilangin, hnam hrisel chu a tithei chauhteah ni loin, mi zawng zawng huap a ni a ti bawk. Ṭhalaite chu zu leh ruihhlo pumpelh turin a chah a, taksa thunun, zirna leh nunkawng hrisel chu khawtlang ngelnghet dinna atan a pawimawh tih a sawi bawk.