Nagaland : Sorkar hnathawkten nawrh huaihawt chhunzawm dawn

Nagaland khawpui, Kohima-a Joint Coordination Committee (JCC) chuan cabinet sub-committee nen meeting an neihah, sorkarin non-state civil service officer-te IAS-a lak luh a tum chungchangah resolution an siam theih loh avangin nawrh (pen down strike) an huaihawt chhunzawm zel dawn tih an puang.

JCC-ah hian state-a service association panga an tel a; All Nagaland State Services Employees Association, Federation of Nagaland State Engineers Service Association, Nagaland In-Service Doctors' Association, Nagaland Secretariat Service Association leh, Nagaland Forest Service Association-te an ni. JCC-in nawrh an huaihawt hnuah, sorkar chuan October 16 khan hemi chungchang enfiah tur leh service association-te nen inbiakna neihpui tur cabinet sub-committee hi a din a ni.

JCC chuan chief secretary office chamber-ah cabinet sub-committee neih a ni a, IAS lak luh dan kalhmanga an thil hriat duh leh, an ngennate thlen a ni tih a tarlang. He thu hi sawi hona hun rei tak neih a ni a, cabinet sub-committee-in an thil phut a pawm theih loh avangin state cabinet thutlukna siam turin dah a ni tih a sawi bawk.

JCC chuan state cabinet thutlukna nghah a nih lai pawhin department leh service association-te chu inlungrual taka awm a, thupek zawm turin a ngen. Nawrh huaihawt mek hi a thawh thumna a ni tawh a ni.

Nagaland sorkar hian on-SCS officer-te chu IAS Nagaland cadre-ah dah luh a tum a, hei hi JCC hian dodalin IAS Regulations bawhchhiatna niin an sawi.