Manipur : Churachandpur IDP-te hnenah nitin mamawh sem

Manipur sorkar chuan Churachandpur district-a tualchhung buaina avanga chenna in leh lo chhuahsan, internally displaced persons (IDP) te hnenah Diwali denchhenin nitin mamawh an sem.

Churachandpur district hruaitute chuan buhfai bag 856, dal bag 175, eirawngbawlna tel box 108, martar bag 68 leh tun hnaia relief camp-a chhungkua awm mekte tan purunsen bag 43 an sem bawk. Churachandpur district-ah hian tun dinhmunah relief camp 81-ah IDP 15,359 an awm mek tih Thawhlehnia official report chuan a tarlang.

IDP-te tana hmalakna an neih zingah taksa sawizawina atan relief camp 20 chuangah volleyball pahnih, football pahnih leh carom set pahnih ṭheuh pek an ni bawk. District deputy commissioner Dharun Kumar S chuan heng infiamna bungruate hi Sadbhavana Mandap, Tuibong relief camp-a programme neihah a sem a ni.

Bungrua semna hun hi Samagra Shiksha, Manipur leh, Zonal Education Office (ZEO), Churachandpur ṭangkawpin an buatsaih a ni. An programme hmang hian district hrang hranga IDP-te chhawmdawl chhunzawm zel a ni. He hunah hian Zonal education officer Esther Chingneikim, ZEO line staff leh relief camp aiawh mi eng emaw zat an tel.