Sikkim: NH-10 khar fo vangin sorkar lungawi lo

Sikkim sorkar chuan state dang nen inthlunzawmna kawng pawimawh, National Highway-10 (NH-10) khar a nih fo avangin a lungawi loh thu a sawi a, tourism leh tualchhung veivahna thlengin a nghawng tih a sawi. Khualzin tlawh tam hunlai a nih avangin harsatna an tawk tih an sawi bawk.

National Highways and Infrastructure Development Corporation Ltd (NHIDCL) general manager, Samrat Sanyal hnena lehkha an thawnah, Sikkim Tourism and Civil Aviation Department additional chief secretary C.S. Rao chuan NH-10 khar a nih fo avangin leh, kawng siamṭhat hna thawh chhung pawhsei a nih avangin harsatna tam tak an tawk tih a tarlang. Kawng khar tam zawk chu hriattir lawkna tel lo leh, siamṭhat hna tenau thawhna atana tih a nih fo thu sawiin, hei hian mipui leh khualzinte tan harsatna nasa tak a thlen ṭhin a ni, a ti.

Sikkim sorkar chuan NH-10 chu an state tan sumdawnna leh economy ṭhanlenna atana pawimawh a nih thu sawiin, tourism industry chu state sum lakluhna ber pakhat a ni tih a tarlang. Official-te chuan NHIDCL chu hun pawimawh bik ni loa an khar ṭhin chu titawp tur leh, kawng siamṭhat pawh a hun taka zawhfel a nih theihnan hma la turin a ngen a ni.