NSCN (IM) hruaituin Manipur tlawh

National Socialist Council of Nagalim (NSCN/GPRN) hruaitu, Thuingaleng Muivah chuan kum 50 hnuah nimin khan Manipur tlawhin, Ukhrul district-a Tangkhul Long Ground-ah mipui tam takin an lo hmuak a ni. Muivah hian a pianna khua Somdal tlawhin kar khat chhung a cham ang.

Kum 91 mi Muivah hi Naga autonomy movement-a mi pawimawh tak niin, kum 1960 bawr chho khan Naga movement a zawm a ni. January 31, 1980-a hel pawl NSCN dintu zingah a tel ve bawk. NSCN hi kum 1988 khan sorkar laipui nen an inbiakdanah an thu a inhmuh loh avangin pawl pahnihah - SS Khaplang kaihhruai, National Socialist Council of Nagaland (Khaplang) (NSCN-K) leh NSCN (IM) ah an inṭhen a ni.

Nimina Muivah lawmna hun buatsaihah hian state hmun hrang hrang aṭanga pawl hruaitu eng emaw zat an tel. Tangkhul Hau Art and Culture Association president, Nobert Tai chuan an hruaitu ropuiin state a tlawh chu lawmawm a tih thu a sawi. Medical team-te chuan Muivah hriselna an endik tih Dr Lucy Duidang chuan sawiin, hruaitu a nih chhunzawm zel theihna turin duhsakna a hlan bawk. Muivah hian kum 2010 khan state tlawh a lo tum tawh a, Manipur sorkarin an dan avangin a tlawh thei ta lo a ni. Tun ṭumah erawh khawtlang pawl hrang hrang zingah; Kuki, Zomi leh Meitei-te pawhin state a tlawh hi an thlawp a ni.