Meghalaya: West Garo Hills police-ten ruihhlo ṭhahnem tak man

Meghalaya-a West Garo Hills police-te chuan, tunkar chhunga hmun hniha ruihhlo do beihpui an thlaknaah ruihhlo tawlhruk ṭhahnem tak an man a, mi pasarih an man tawh bawk.

Beihpui an thlakna hmasa zawk hi Upper Damalgre-ah neih niin, Anti-Narcotic Task Force (ANTF), Araimile Police, Sadar Police leh, 120 BN CRPF ṭangkawp chuan Garobadha aṭanga Tura lam pan, khualzin phur bus-ah ruihhlo zuar nia rinhlelh Ajay Debnath (24), Niranjan Chakraborty (28) leh Suman Sen (26), Tura-a chengte chu an man. An kut aṭang hian heroin gram 2.1 an man sak a, NDPS Act hnuaiah thubuai siamsak niin chhuizui nghal an ni.

Beihpui thlak thawh hnihna neihah, Dadenggre bula auto rickshaw aṭangin mi pali; Prosonjit Dalu, Kriston A. Sangma, Sengbath Ch. Momin, leh Sonu A. Sangma-te an man bawk a, an kut aṭang hian SP strip 42, capsule 1,008 (gram 388) chu an man sak an ni. Heroin leh P-Neitra tablet pawh man tel niin, Dadenggre Police Station-ah thubuai ziahluh nghal a ni bawk.

West Garo Hills police-te chuan ruihhlo tawlhruk tihtawp leh, helai district-a ruihhlo hmang sual an pun zel lohna turin nasa takin hma an la a ni. Mipuite chu ruihhlo zuar rinhlelh an nei a nih chuan police station hnai ber emaw, Tura Police Control Room-ahte report turin an hriattir bawk. Superintendent of police Abraham T Sangma chuan district-ah ruihhlo leh a kaihhnawih do turin khauh takin hma an la zel dawn tih a sawi.