Tripura : Bishalgarh sub-divisional hospital-in NQAS certificate dawng

Tripura-a Bishalgarh sub-divisional hospital, Sepahijala district-a awm chuan Ministry of Health and Family Welfare hnen aṭangin National Quality Assurance Standards (NQAS) certificate a dawng.

He chawimawina hi khawtlang tana healthcare service him, ṭha leh damlo enkawl kawnga hna thawh ṭhat avanga hlan a ni.Certificate hian department pawimawh hrang hrang - OPD, IPD, OT, Laboratory, Pharmacy, Maternity, leh Emergency unit bakah a dangte pawh a huam a ni.

State leh national team-ten uluk taka healthcare an kalpui dan leh, damlo enkawl kawnga an hmalaknate endikna an neih hnuah, damdawi-in hi chawimawina hlan a ni. Sepahijala district magistrate Siddharth Shiv Jaiswal chuan chawimawina an dawng chu lawmawm a tih thu leh, inchhuanna tham a ni, tiin Bishalgarh Subdivision-a healthcare service tihchangtlunna tur a nih thu a sawi bawk.

Damdawi-in enkawltute pawhin doctor, nurse, health worker leh staff zawng zawngte inpekna rah a nih tih an tarlang. Official-te chuan healthcare infrastructure tihchak bakah, Bishalgarh leh a chhehvela mipuite tan service awlsam, quality ṭha tak neih theihna tura an hmathlirte a takin a lang chhuak tih an sawi.