Hornbill Festival vawi 20-na ṭan
Nagaland state-a tourism event lian ber, ni 10 awh tur Hornbill Festival vawi 20-na chunimin khan Naga Heritage Village, Kisama-ah neih ṭan a ni. He festival buatsaihna atan hian state sorkar chuan cheng vaibelchhe nga a dah a ni. Nimina Nagaland Statehood Day vawi 57-naah festival hi hawn a ni a, chief minister Neiphiu Rio chu festival thlengtu niin, Governor RN Ravi chu khuallian a ni.
MLA leh adviser to the Tourism and Art and Culture Department Khehovi Yepthomi chaun kum 2018 khan festival buatsaihna atan hian cheng vaibelchhe nga bawk dah a ni a, mahse an sum senral chu cheng vaibelchhe 7.98 a ni tih a sawi. Hetihlai hian festival aṭanga an sum hmuh hi cheng vaibelchhe 45 zet a tling pha thung. Yepthomi chuan kuminah festival chhimtu hi nikum aia an pun beisei a nih thu leh, sum senral leh lakluhte pawh nikum aia a tam a rin thu a sawi.
Kum 2018 Hornbill Festival chhimtu kha mi 2,51,701 an tling a, an zingah hian ramdang aṭanga kal 2,702 an tel. Ram chhung state dang aṭanga chhimtu 37,397 awmin, state chhung aṭangin mi 2,11,602 in an chhim bawk. Kumin festival-ah hian Reliance Jio Infocomm Ltd chu digital partner a ni a, fetival neihna hmun hrang hrangah Reliance Jio chaun free WiFi booth a siam a ni. Festival neih chhung, ni 10 chhung hian Jio TV chuan live streaming a pe dawn bawk a ni.