Assam cabinet-in hmasawnna hna thawh tur hrang hrang pawm

Assam chief minister Himanta Biswa Sarma kaihhruai Assam cabinet chuan Ningani khan, hmasawnna leh inrelbawlna thlak danglamna tur eng emaw zat pawmin, chung zingah chuan industry ṭhanlenna, leilung fate hnena ram pek, zirtirtute hamṭhatna leh mipui vantlang thuam chakna turte an tel.

Cabinet meeting neih zawha thuthar lakhawmtute a kawmnaah, CM Sarma chuan sorkarin state economy leh social landscape tihdanglamna turin project pawimawh tak tak a sanction tih a sawi. Heng zingah hian Assam Petrochemicals Ltd-in 500 TPD Methanol leh 200 TPD Formalin plant project senso chu cabinet chuan Rs vbc 2,267.22 a tihpun a phalsak.

Chief Minister chuan investment tihchangtlun hian Assam industry nasa takin a thuam chak dawn a, hmarchhak biala petrochemical hub-ah a hlangkai dawn a ni, a ti. Hei bakah direct leh indirect-in hnathawh tur a siam dawn a, chemical siam chhuah kawngah intodelhna a thlen dawn tih tarlangin, project hi Atmanirbhar Assam thil tum nen a inmil tih a sawi bawk.

Cabinet chuan mipui vantlang hamṭhatna tura thutlukna lian tham a siam zingah, Mission Basundhara 2.0 hnuaiah leilung fa state-a ram nei lo chhungkuate hnena ram pek tura rawtna 224 a pawm bawk. He hmalakna hian hun rei tak chhung ram chungchanga buaina awm tawhte a sukiang thei dawn a ni.

Zirna sector-ah cabinet chuan The Assam Elementary and Secondary Schools Teachers’ (Regulation of Posting and Transfer) (Amendment) Bill, 2025 pawh a pawm bawk a, Assam Legislative Assembly session lo awm turah put luh a ni ang. Hman a nih hunah chuan Sarba Siksha Abhiyan (SSA) hnuaia zirtirtu, contract-a hna thawk mek 12,000-te chuan a ngheta thawh theihna tur an dil thei dawn a ni.