Nagaland University-in cancer research laboratory hawng

Nagaland University (NU), Lumami chuan science lama hmasawnna leh helai biala cancer natna vei pung zel hmachhawnna tur atan Ningani khan Zoology department-ah cancer research laboratory a hawng a, workshop neih nghal a ni.

Hawnna inkhawmah hian NU vice-chancellor, Prof. Jagadish Kumar Patnaik chu khuallian niin, NU registrar Dr Abemo chu guest of honour a ni. Laboratory sak thar endikin khuallian chu laboratory facility leh hmanrua awmte an hrilhfiah bawk.

Prof. Jagadish Kumar Patnaik chuan cancer natnain a chhungkua leh laina hnai thlengin harsatna a thlen tih a sawi a, Nagaland University-a scientific research tihmasawn tura a beihnate tarlangin, thawktute leh zirlaite chu theihtawp chhuah turin a ngen. Scholar-te chu kobiraz (tualchhung damdawi lam thiamte) nen thawk hoin, damdawi hriatchhuah kawngah hma la turin a ngen bawk a ni.

Dr. Abemo pawhin university chhunga science lama hmasawnna tura vice-chancellor hmathlir chu lawmawm a tih thu a sawi. Department leh healthcare facility-te chu cancer awm lohna hmuna siam tura thawh hona ṭha nei chhunzawm zel turin a fuih a, Nagaland University chuan cancer venna leh tihdam kawngah theihna nasa tak a nei a ni, a ti.