Manipur-in Shillong-a Rajbari thawm ṭhat hna thawk turin committee din

Manipur khawpui, Imphal-a Mini Conference Hall of the City Convention Centre-ah Shillong-a Manipur Rajbari thawm ṭhat hna thawh dan ngaihtuahin meeting neih a ni.

Meeting hi MAHUD and IPR director Ngangom Uttam Singh kaihhruainaa neih a ni a, mi thiamte chuan Manipur Rajbari architecture vawnhim pawimawhnate an sawilang. Meghalaya khawpuia Manipur royal heritage awm chu state hming chhertu a ni, an ti bawk.

Kumin September 29 leh October 8 inkara Rajbari ṭhiah a nih chungchangah, Manipur sorkar chuan October 13 khan Monitoring and Supervision Committee a din a, Manipur Bhavan, Rajbari (Red lane) Building, Shillong-a sak ṭhat leh thawm ṭhatna turah hma an la dawn a ni. Committee hi thawm ṭhat hna thawh, stakeholder-te nen thawh hona leh, project quality ngun taka enthlithlai tura tih an ni. Committee-a telte chu rawtna an neihte leh an ngaihdante chhawp chhuak tura tih an ni.

Sawi hona an neih hnuah, mithiamte chuan Monitoring and Supervision Committee hnenah rawtna pawimawh pathum an siam a; Anastylosis hmanga thawmṭhat, Archaeological Survey of India (ASI) leh UNESCO kaihhruaina hnuaia ruahmanna kimchang siam tur leh tihhlawhtling turin conservation leh preservation lama mithiamte thawhpui bakah, tualchhung professional-te leh conservation lama mi thiamte nen thawh hona ṭha neihte an rawt.