Arunachal Pradesh: CM-in Tokyo-ah high-level meeting nei

Arunachal Pradesh chief minister, Japan tlawha zin mek Pema Khandu chuan Ningani khan Japan khawpui Tokyo-ah culture, economy leh technology lama Japan leh India-in thawh hona ṭha zawk neih theihna tura high-level meeting an neihah a tel.

CM Khandu chuan Japan House of Representatives member leh Japan- India Parliamentary Friendship League chairman, Yasutoshi Nishimura nen inbiakna neiin, India leh Japan-in thawh hona ṭha zawk an neih theihna tur an sawidun. Chief Minister hian ASEAN Group Co. Ltd chairman leh CEO Toshiaki Nishikawa pawh a hmu bawk a, Nishikawa chuan Japan-a India mi hnathawk tura lak luh tihpun tum a nih thu sawiin, Japan ṭawng zir leh thiamna tihhmasawnna atan India state eng emaw zat nen thawh hona an kalpui mek thu a sawi.

Khandu hian, Japan hruaitu senior- Policy Research Council and the Tax System Research Council hruaitu Itsunori Onodera; House of Representative member hlui Yoshiaki Wada; leh House of Councillors member Rui Matsukawa-te nen meeting an nei bawk. Sawi hona an neihah, ram pahnih inlaichinna thuk zawk siam leh, prime minister Narendra Modi-a'n India-Japan inlaichinna nghet zawk siamna tura a hmathlirah tihhlawhtlinna tura thawhhona tihhmasawn chungchangte an sawi a ni.

Official-te chuan Khandu-a'n Japan a tlawh chu Arunachal Pradesh leh Japan inkara culture leh strategy inzawmna tihchakna bakah technology, infrastructure, leh human resource development lama thawh hona tihmasawnna tura hmalakna a ni tih an tarlang.