Manipur : Dengue natna vei mi 3,114 tling tawh

Manipur-ah Inrinni liam ta khan darkar 24 chhunga dengue test, mi 235 an neih zingah mi 151 chuan dengue natna an vei tih hmuhchhuah a ni. Dengue natna vei awm hmuh chhuah tawh hi mi 3,114 an tling tawh a, pakhatin a thihpui tawh tih state health department chuan a tarlang.

Report tarlan danin, kumin January 1 aṭanga October 24 thleng khan dengue natna vei hi mi 7,054 an test aṭangin mi 3,114 an awm tawh. Imphal West chu natna vei tamna ber niin, mi 2,186 an awm a; Imphal East-ah mi 556, Thoubal-ah mi 408 leh Bishnupur-ah mi 346 an awm a. Bishnupur-ah mi pakhat chu dengue natna vang hian a thi tih report a ni bawk.

Inrinni khan Regional Institute of Medical Sciences (RIMS) chuan mi 42 an test zingah mi 21-in dengue an vei tih a hmuchhuak a; Jawaharlal Nehru Institute of Medical Sciences (JNIMS) chuan mi 187 ah mi 124 an hmuchhuak bawk. Bishnupur, Chandel, Churachanpur, Kangpokpi leh Ukhrul-ah mi pakhat ṭheuh hmuh chhuah an ni bawk tih Directorate of Health Service chuan a tarlang.

Manipur-ah hian kum 2024 khan dengue natna vei mi 2,463 an awm a, mi pangain an thihpui a ni. Kum 2023-ah mi 2,548 in an vei a, thi erawh an awm lo thung. He natna do tur hian department chuan tualchhung hmun 1,968 leh relief camp parukah thosi hlo kah beihpui a lo thlak tawh a, awareness campaign vawi1,535 a lo buatsaih tawh bawk a ni.