Assam : DGP-in venhimna kalpui dan enfiah

Assam director general of police (DGP) Harmeet Singh chuan Inrinni khan Upper Assam-ah venhimna kalpui dan endikin a tlawh. Upper Assam huam chhung, Tinsukia district-a Kakopather-a Indian Army base camp leh, Arunachal Pradesh-a Changlang district-a Manmao huamchhung amite chuan tun hnai khan beih an tawk a ni. DGP chuan he thil thlen hnu hian venhimna kalpui dan tur ngaihtuahin meeting vawi ruk leh, high-level coordination meeting vawikhat neih a ni tawh tih a sawi.

Security force-te chuan beihpui an thlaknaah Namsai district-a ULFA (Independent) member pakhat an kap hlum a, Assam police-te pawhin Tinsukia-ah mi dang pasarih an man bakah, silai leh silaimu an man bawk. Tinsukia superintendent of police (SP) office-a Inrinni tlaia thuthar lakhawmtute a kawmnaah, DGP Singh chuan review meeting-ah hian security agency zingah Indian Army-te chu vehimna khauh zawka kalpui tura tih an nih thu a sawi a, invauna thleng ṭhinah pawh a rang lama hma la turin hriattir an ni tih a tarlang.

Sipaite beih an nih ṭhin avang hian Singh chuan security force-te chu thawh hona ṭha nei tura tih an nih thu leh, Upper Assam-a hmun parukah venhimna kalpui tura an hmalaknate a enfiah thu a sawi. DGP chuan helpawlte chu tharum thawhna bansan a, remna leh muanna lam kawng zawh turin a ngen bawk. Chief minister Himanta Biswa Sarma pawhin helpawlte chu inbiakna nei turin a sawm tih a sawilang bawk.