Meghalaya : Minister-in Dhaka-ah Tirot Sing Syiem lim dah leh tum

Meghalaya Arts and Culture minister Sanbor Shullai chuan, kumin kum tir lama Bangladesh khawpui Dhaka-a Khasi zalenna sualtu, Tirot Sing Syiem lim tihchhiat tak chu dah leh a tum thu a puang. October 24 khan Shullai chuan Bangladesh-a Indian Embassy nen inbiakna neiin, lim hi siamṭhat leh a tum tih a sawi.

Shullai chuan Tirot Sing Syiem lim chu Dhaka-a buaina chhuak vangin tihchhiat a ni. He thil thlengah hian a lungawi loh thu a sawi a, Bangladesh dintu lim pawh tih chhiat a ni tih a sawi. Hemi chungchangah hian Shullai chuan project thawh turah commissioner leh secretary F Kharkongor nen inbiakna an nei tawh tih sawiin, amah ngeiin Dhaka hi tlawh a, lim tihchhiat tak chu a thar a thlak tur pawh endik a tum tih a sawi.

Thuneitute chu Dhaka a tlawh hun tur tifel thuai tura beisei an ni a, a tlawh chhung hian Shullai chuan Tirot Sing Syiem lim chu a dahna hmun dik takah dah a ni em tihte a endik dawn a ni. Tirot Sing Syiem hi kum zabi 19-na hunlaia Khasi hruaitu lu a ni a, British hoin Khasi Hills an awp zau zel tur duh lotu leh do tlattu a ni a, tun thlengin Meghalaya-ah ngaihhlut leh ngaihsan a la hlawh hle a ni.