By-election : Ruling party-te'n hnehna an chang

Hmarchhak state pathum Assam, Tripura leh Arunachal Pradesh-ah by-election, te November 19-ah neihah ruling party-te chuan hnehna an chang.

Bharatiya Janata Party (BJP) chuan Assam-a Lakhimpur Lok Sabha constituency leh Baithalangshu Assembly by-election-ah hnehna an chang. Assam Chief Minister Sarbananda Sonowal chuan Thawhlehni khan, BJP-te'n hnehna an chan theihna chhan chu Prime Minister Narendra Modi-a'n huaisen taka Rs 1,000 leh Rs 500 note a tih thih ngamna rah a ni, a ti. Hnehna chuan mipuiten pawisa note thi an thlawp a ni tih a tilang chiang hle a, PM thutlukna siam chu mipuiten an thlawp ṭha a, a hmalakna chuan rah ṭha a chhuah zel ang, Sonowal chuan a ti. Sorkar laipui leh Assam sorkar te chuan thawhhona ṭha an neih thu sawiin, chu chu inthlan result hian a tilang chiang a ni, a ti bawk.

Sonowal chuan Modi chu fakin, a hma-lakna te a hlawhtlin theihna turin theihtawp a chhuah a, chu chuan ram mipuite tan kawng a siam a ni, a ti. Pawisa note thi thlak nana hmalakna kawngah Reserve Bank of India nen ṭha takin mipui tan an thawk a, hun reiloteah pawisa indaih lohna chu a reh thuai dawn a ni, a ti. Prime Minister hmalakna a hlawhtlin theih nana RBI, SBI leh Bank dangte hmalakna chu fakawmn a tih thu a sawi bawk.

BJP candidate Pradan Baruah chuan Lakhimpur Lok Sabha canstituency-ah hian a khingpuite, Congress party candidate Hema Hari Pegu, CPI candidate Amiya Kumar Handique, SUCI ticketa ding Hem Kanta Miri leh Independent candidate Dilip Moran-te chu a hneh a ni. Baithalangso constituency-a BJP candidate Mansing Rongpi chuan a khingpuite, Rupon Sing Ronghang (Cingress) leh Rajen Timung (Independent) te a hneh bawk. Assam-ah hian a ṭum khatna atan BJP chuan sorkarna an chang mek a, kumin state assembly election-ah khan Congress party chu kum 15 chhung zet ro an rel hnuah paihthlak an ni.

By-election neihna state dang Tripura leh Aruanchal Pradseh-ah pawh ruling party-te'n hnehna an chang. Tripura-ah chuan rorel lai Communist Party of India-Marxist (CPI-M) chuan Barjala leh Khowai assembly constituency-ah te hnehna an chang. Constituency pahnihah hian CPI (M), Trinamool Congress, Bharatiya Janata Party leh Congress party te chuan candidate an thehchhuak a ni. Barjala constituency-ah chuan CPI (M) candidate Jhumu Sarkar chuan amah hnaih bertu BJP candidate chu vote 3374-in a hneh. Khowai constituency-ah pawh CPI (M) hian hnehna an chang chiang hle a, anmahni hnaih bertu TMC chu vote 16094-in an hneh a ni.

Left Front Committee chuan CPI (M) hnehna chan chu an lawmpui thu an sawi. Tripura assembly-ah hian seat 60 awmin, rorel lai Left Front chuan MLA 51 neiin, TMC chuan MLA paruk an nei a, Congress-in pathum an nei bawk.

Arunachal-ah pawh Anjaw district-a Hayuliang constituency by-eletion result chu puan a ni tawh a, North East Democratic Alliance (NEDA) candidate Dasanglu Pul-i chuan hnehna a chang. Dasanglu Pul hian Independent candidate Yompi Kri chu vote 942-in a hneh a ni. BJP ticket-a ding Pul-i hian vote 5,326 a hmu a, Kri hian vote 4,384 hmuin, an inthlauhna hi a tam lo hle. Pul-i hi Arunachal Pradesh chief minister hlui Kalikho Pul-a nupui a ni. Hayuliang constituency hi Pul-a bial a ni a, Pul hi a room-ah thia hmuh a ni.

Chief Electoral Officer Kaling Tayeng chuan vote tla zat chu 72% a tlin phak thu sawiin, harsatna thleng lian tham a awm loh thu a sawi bawk. Arunachal assembly-ah hian seat 60 awmin, rorel lai People’s Party of Arunachal (PPA) chuan MLA 43 a nei a ni.