CNTC-te'n Hmeichhe tana seat hauhsak duh lo

Central Nagaland Tribes Council (CNTC)-te chuan Nagaland sorkar-in Urban Local Bodies (ULBs)-a hmei-chhiate tana seat 33% hauhsak a tum chu an duh loh thu an sawi ve leh.

Hmeichhe tana seat 33% hauhsak tura state sorkar hmalakna chu tribal pawl hrang hrangten an duh loh thu an sawi a, lungawi lohna vawi eng emaw zat an lantir tawh. CNTC-te chuan seat reservation siam tum chuan Naga customary law and rights a bawhchhia niin an sawi a, Article 371 A kalh a nih thu an sawi bawk. State sorkar chu reservation policy a duan mek titawp tura an phut thu CNTC-te chuan an sawi.

State cabinet chuan ULB-a hmeichhe tana seat 33% hauhsak tur hian thutlukna a lo siam tawh a, mahse dodalna a nasat avangin tun thlengin hman a la ni lo. CNTC-te chuan sorkar hnuaia mi ni lo, pawl hrang hrangte chuan sorkar policy do dal turin dikna an nei tih sawiin, policy ṭha lo chu hnawl ngam turin
ṭanrual a ngaih thu an sawi. CNTC-te hian Oil and Natural Gas drilling rights siam ṭha turin state sorkar an phut tih an tarlang bawk.

Hetih lai hian Nagaland Chief Minister TR Zeliang chuan reservation policy chu kaltlangpui a nih tur thu a sawi. Zeliang chuan tun hnai khan Nagaland Municipal Act, 2001 and Amendment Act chungchangah meeting an neih thu sawiin, civic body election-a hmeichhe tana seat 33% hauhsak chungchang an sawi lan thu a sawi. Meeting-ah hian Nagaland Assembly member, Chief Secretary leh Tribal Hohos aiawhte an tel. Anni bakah hian Naga Hoho, ENPO, Ao Senden, APO, Konyak Union, Chakhesang Union, Lotha Union leh Rengma Union-te chuan meeting hi an chhim.

Reservation policy chungchangah vek hian Naga Mothers Association-te chuan apex court-ah petition an lo thehlut tawh a, court thutlukna ngaihchan mek a ni.