Manipur CM-in Rajnath Singh hma lak pui turin ngen

Manipur Chief Minis-ter Okram Ibobi Singh chuan tun hnai khan Union Home Minister Rajnath Singh chu New Delhi-ah hmuin, United Naga Council (UNC)-te'n November 1 aṭanga National Higway an dan titawp tura hma lak pui turin a ngen.

Manipur CM hian Rajnath chu UNC-te'n Sadar Hills leh Jiribam-te district-a hlankai tum duh lohna lantira NH an dan chah avanga harsatna an tawh hrang hrangte a sawipui. Singh chuan, Sadar Hills leh Jiribam-te chu district-ah hlangkai turin sate sorkar chuan hma a la tih sawiin, pek an ni ngei dawn em tih erawh a hriat loh thu Rajnath a hrilh. Ruahmanna mai a la ni a, a hlawhtling ngei dawn em tih erawh a sawi theih loh a ni, a ti. Union Home Minister chu harsatna an tawh mek sutkian a nih theih nana pui turin CM chuan a ngen a, mipuite tawrhna hriatthiam pui a, chak tak hma lak pui turin a ngen a ni.

Ibobi Singh chuan buaina chingfel turin state sorkar chuan hma a la reng tih sawiin, district pek duh leh duh lo pawl ṭhenkhat ten nawrh an huaihawt reng avangin hma lak chak a harsat thu a sawi. Sadar Hills leh Jiribam-te ditrict-a hlankai duh lotu UNC-te chuan November thla tir aṭang khan NH an dang chat a, hei hian harsatna a thlen nasa tawh hle. Nitin mamawh lakkhawmna kawngpui pawimawh dan a nih vang hian mipuiten harsatna an tawk mek a, chinfel thuai a nih loh chuan harsatna lian zawk hmachhawn thei dinhmunah Manipur chu a ding mek a ni.

Manipur sorkar chuan Naga-te chungchangah hian sorkar laipui chu hma lak pui turin a ngen fo a, inbiakna pawh an nei tawh a ni. Tun hnai khan sorkar laipui chuan UNC leh Naga pawl
ṭhenkhat te chu NH dan a nih chungchangah hian inbiakna an neih pui a, hetih lai hian Manipur sorkar chuan sawmna a dawng ve lo nia sawiin, a tel ve lo thung. Manipur-ah hian Ningol Chakouba, Kut leh Sangai Festival-te hman mek a ni a, UNC-te'n NH an dan chhunzawm zel avangin mipui nawlpui nungphung a buai hle tih tarlan a ni.