Manipur Deputy CM-in Venhimna ṭha zawk pek tiam

Manipur Deputy Chief Minister Gaikhangam chuan All India Radio Imphal-a staff-te chu venhimna ṭha leh khauh zawk pek an nih tur thu Thawhlehni khan a sawi.

Manipur khawpui Imphal-ah 'Sangai Festival' hman mek a ni a, hetih lai hian buaina siam tum tute chetna avangin boruak a ralmuang lo hle nia tarlan a ni. Tunkar Thawhṭannni khan festival hi ṭan a ni a, November ni 31 thleng a awh ang. Ṭan a nih hma, kar kalta Pathianni khan festival hmanna kianga awm AIR Imphal complex-ah bomb a puak a, mi pakhat a thih bakah, CRPF mi leh sa pahnihin hliam an tuar. He thil thleng vang hian AIR Imphal-a staff te chuan AIR Complex-ah lungawi lohna an lantir a, venhimna ṭha zawk pek an nih loh chuan Festival News pek chhuah an tum loh thu an sawi.

Manipur Deputy Chief Minister chuan AIR staff-te chu venhimna ṭha zawk pek an nih tur thu Thawhlehni khan a sawi a, hemi hnu hian AIR Imphal chuan Festival news pekchhuah a nih tur thu an tarlang ve bawk.

Sangai Festival hi Manipur-a festival lian leh ngaihhlut hlawh ber a ni a, ni 10 chhung hman a ni ang. India ram mai bakah ṭhenawm ram eng emaw zat aṭangin khualzin an fuankhawm ṭhin a ni.