Arunachal Pradesh : 'PEMA 3.0' hnuaiah infiamna lamah hma la dawn

Arunachal Pradesh chief minister Pema Khandu chuan, state puma ṭhalaite talent tihpunna atan leh, infiamna chawikan a nih zel theihna turin a kaihhruai sorkar chuan hma a la zel dawn tih a sawi a, 'PEMA 3.0-Year of Reforms & Growth' hnuaia infiamna lama hmasawnna an neihte a tarlang bawk.

Chief Minister chuan tun hnaia a social media post-ah state-in infiamna lama a hlawhtlinna leh, infiamna ecosystem ngelnghet neih leh mi zawng zawng huapzo kalpui mek a ni tih a sawi.

Arunachal-in ram chhung leh ram pawna infiamna lama hming a chher dante tarlangin, CM Khandu chuan infiamnaa inelna hrang hrang aṭangin an state-a infiammiten medal 1,200 chuang an lak tawh thu a sawi. A bulṭhut aṭanga infiammi beisei awm tak takte hriatchhuah leh enkawl zuina tura ruahman, Arunachal Olympics Mission pawh hlawhtling taka hawn a nih thu a sawi bawk.

Khandu chuan state sorkarin infiammite tan sum lama ṭanpuina tur a ruahman tih sawiin, training facility tihchangtlunna atan infrastructure lian tham tak takte thawmṭhat a ni dawn tih a sawi bawk. Sorkarin hun rei tak aṭanga a hmathlir chu infiamna hmanga ṭhalaite chakna pek, leh mahni inthunnunna tihhmasawnte a nih thu a sawi.