Nagaland : Human Rights and challenges seminar nei

Nagaland khawpui, Kohima-a DPDB Conference Hall-ah October 25 khan Northeast Support Centre and Helpline - Northeast Law Network leh Nagaland State Human Rights Commission (NSHRC) ṭangkawp chuan 'One-day seminar on Human Rights and challenges in Nagaland' an buatsaih.

Conference-ah hian civil society organizations (CSOs), St. Joseph Autonomous College, Jakhama-a zirlai pawl bakah Delhi aṭangin Avaazein Foundation team-te an tel. Seminar hi NESCH–NELN, Nagaland office, advocate Abel Ayemi chuan a kaihruai a, NSHRC chairman justice Songkhupchung Serto-a'n thu a sawi bawk.

Justice Serto chuan mihring dikna chanvo humhalh a pawimawh thu sawiin, thupui sawi hlawh ber zinga mi ni mah se, mipui ngaihven tlem ber a ni, a ti. Hansa Mehta thawh hlawkzia sawiin, Universal Declaration of Human Rights Article 1-ah, 'Mihringte chu zalen leh intluktlanga piang kan ni' tih thailangtu a nih thu a sawi. An commission-in kum hnih chhunga vantlang damdawi-in, sikul, leh thihna chungchanga an hnathawhte a tarlang bawk.

Chümoukedima-a thihna thlengah, mitthi chhungte hnenah NSHRC chuan zangnadawmna Rs nuai 5 pek a rawt tih sawiin, hemi hnu hian sorkar chuan a pe chhuak tih a sawi. Commission chuan state-a kum nga chhung tihdanglam tawh loh, hlawh chungchangah hmarchhak state dangte nena inmil zawka kalpuina atan enfiahna nei ṭhin turin a ngen bawk. Hei bakah Nagaland-a life-saving medical procedure awlsam zawka kalpui a nih theihna atan, Organ Transplantation Act hman a rawt bawk a ni.

NESCH advocate leh general secretary Dr Alana Golmei chuan, India ramah hmarchhak mipuite dikna chanvo rahbeh sak an nih thu a sawi. Chi inthliarna, hnathawhna hmuna intihduhdahna, leh mihring hralh chungchanga harsatna an tawhte tarlangin, zirna inah leh vantlangah inzirtirna neih a pawimawh thu a tarlang.