Manipur : Japan-ah Chakhao white rice thawn dawn

Manipur-a agriculture department chuan, kumin November-December chhungin Chakhao white rice (buhfai) batch hmasa ber, metric ton 20 chu Japan-ah thawn chhuah a tum tih official-te chuan an sawi.

Agriculture department director Peter Salam chuan, department chu Bharat International Rice Conference (BIRC), Bharat Mandapam, Pragati Maidan, New Delhi-a October 30-31-a neih turah a tel dawn tih a sawi. Indian Rice Exporters' Federation leh Agriculture and Processed Food Products Export Development Authority (APEDA) ṭangkawpin an buatsaih, BIRC-ah hian rampawn lam aṭanga India buhfai leitu tur, ram 80 chuang aṭangin an tel dawn a, loneitu pawl 3,000, exporter 2,500, miller leh an thawhpui industry-te an tel dawn bawk a ni.

He hunah hian Japanese, Korean leh Chinese chaw chu Chakhao black leh white rice hmangin siam a ni dawn tih department chuan Pathianni khan a tarlang. Department chuan APEDA nen Japan-a Chakhao white rice MT 20 thawn chhuahna turah Memorandum of Understanding (MoU) an ziak nghal bawk ang.