Assam : CM-in Silchar-ah Super Speciality Hospital lungphum phum

Assam chief minister Himanta Biswa chuan Barak Valley-a ni hnih chama a zinnaah, Silchar Medical College and Hospital-ah Super Speciality Hospital sakna tur khum 208 awmna tur lungphum a phum.

CM Sarma chuan damdawi lam zirnaa Assam hmasawnnate sawi langin, kum 2006-a Health Minister a nih laiin medical college-ah MBBS seat 360 chauh a awm ṭhin a, postgraduate-ah seat 150 chauh a awm ṭhin thu a sawi. Tunah chuan MBBS seat 2,000 a awm tawh a, postgraduate program-ah seat 1,500 a awm tawh tih a tarlang bawk.

Damdawi-in thar sak tur hi Japan International Cooperation Agency (JICA)-in sum lama a puihna hmangin ram bigha 16-a zauah sak a ni ang. Clinical department paruk - Cardiology, Cardiothoracic Surgery. Neurology, Neurosurgery, Nephrology, leh Urology-te an awm dawn a ni. Infrastructure leh damdawi lam hmanrua atana an sum sen tur zat hi Rs vbc 300 vela ruahman niin, thla 30 chhunga sak zawh hman tum a ni.

Damdawi-inah hian super-speciality department-ah khum 20 dah a ni dawn a, emergency bed 15, ICU/ICCU-ah khum 27, post-operative care-ah khum 24, pre-operative care-ah khum 16, dialysis-ah khum 10 leh cabin-ah khum 25 dah a ni ang.