Court-in AP Speaker leh Congress MLA hluite insawifiah turin hriattir

Gauhati High Court chuan Ningani khan, Arunachal Pradesh Assembly Speaker leh Cong-ress MLA hlui 43-te chu Congress party chhuah-sana People’s Party of Arunachal (PPA) an zawm chungchangah insawifiah turin a hriattir.

Arunachal Pradesh Congress Committee chief Padi Richo chuan Assembly Speaker leh Congress MLA hlui 43-te chungchangah hian Guwahati High Court Itanagar bench-ah petition a thehlut a ni. Court chuan January 4, 2017 thleng insawifiahna hun a pe tih Justice Michael Zothan-khuma chuan a sawi. Court-in Congress party chhuahsana PPA an zawm chungchanga insawifiah tura a hriattir zingah hian chief minister ni lai Pema Khandu pawh a tel.

September 16 khan assembly speaker chuan rorel lai Congress MLA 43 te chuan regional party People’s Party of Arunachal (PPA) an zawm thu hi a tarlang. September 16 vek hian Legislative Assembly Secretary chuan Congress MLA-te'n PPA an zawm thu hi a tarlang bawk. Hemi chhungchanga petition thehluttu Padi Richo chuan Congress MLA-te'n party chhuahsan a, party dang an zawm tur thu hi Congress state unit an hriattir lo niin a sawi. Richo chuan national party member-te'n regional party an zawm chu Election Commission dan kalh a nih thu sawiin, speaker chuan dan a bawhchhia niin a sawi bawk. Kha tih hun laia Congress Chief Minister Pema Khandu leh MLA dang 42-te'n PPA an zawm hi speaker chuan phalsakin, “Assembly Bulletin”-ah tarlan a ni, Richo chuan a ti.

Aruanchal Pradesh-ah hian Congress MLA eng emaw zat chu helin, party an chhuahsan a, Congress sorkar paihthlak zui a ni. Nabam Tuki-a kaihhruai Congress sorkar paihthlak a nih danah hian thil dik tawk lo a awm nia sawiin, Supreme Court chuan kumin July thla khan Arnachal Pradesh-ah hian Congress sorkar din leh turin thupek a chhuah. Sorkar paihthlak a nih laia chief minister Nabam Tuki chuan a lalṭhuthleng kalsanin, House-a floor test hmachhawn ngai loin Pema Khandu chu chief minister atan lakluh a ni a, Congress MLA hel te pawhin party an zawm leh. Deputy Chief Minister atan Congress hruaitu hlun Chowna Mein pawh lakluh a ni nghal bawk.

Khandu leh MLA dang 42-te chuan reilote hnuah Central-a Congress party nen an inzawmna chhu chatin, regional party People’s Party of Aruna-chal (PPA) an zawm a ni. Hemi chungchangah hian Arunachal Pradesh Congress Committee chuan thil dik lo a awm ngei nia sawiin, Court-ah hian an zualko a, Guwahati High Court chuan Arunachal Pradesh Assembly Speaker leh Congress MLA hlui 43-te hi January 4, 2017 ral hmaa insawifiah turin thupek hi a chhuah ta a ni.