Arunachal-in National Cultural Festival lian ber thleng dawn

Union Ministry of Culture chuan India rama cultural festival lian ber 'Rash­triya Sanskriti Mahotsav' chu Arunachal Pradseh-a Tawang-ah nghat turin thutlukna a siam niin North East Zonal Cultural Center (NEZCC) Director Lipokmar Tzudir chuan a sawi.

NEZCC Director Tzudir chuan, hemi chungchang ngaihtuah hian Chief Minister Pema Khandu kaih­hruai­nain art & culture department official-te chuan Ningani khan meeting an nei a, festival neih hun tur bakah thil pawimawh dang ngaihtuah a ni, a ti. Festival hi Ministry of Culture chuan a sponsor dawn a, nakkum March 2-6 chhungin Tawang-ah neih a ni ang. 'Rashtriya Sanskriti Mahotsav' hi kum tin hman ṭhin a ni a, India culture hrang hrang pholanna atan leh, art, artisan, dance bakah handicraft tihlar nana hman ṭhin a ni.

NEZCC Director chuan festival-ah hian India ram hmun hrang hrang aṭangin artist 600 vel an fuan­khawm beisei a nih thu sawiin, Zonal Cultural Centre pasarih - East, West, North, South, North Central, South Central leh North East aṭang tein mi ṭhahnem tak an tel theih beisei a ni, a ti. NEZCC chuan Union Ministry of Culture aiawhin festival hi an huaihawt dawn a ni. Union Minister of Culture Dr Mahesh Sharma chuan Arunachal Pradesh-in 'Rashtriya Sanskriti Mahotsav' a thleng thei tur chu lawmawm a tih thu sawiin, state sorkar hmalakna a fak. Tawang-ah festival ngah a nih theih nana hma latu Union MoS Home KirenRijiju chu fakin, an state-ah ngei India rama Cultural Festival ngha a ni tur chu Rijiju-a tana thil lawmawm tak a ni, Sharma chuan chuan a ti bawk.

Tzudir chuan Arunachal khawpui Itanagar-a, NEZCC regional cultural center din a nih theih nan CM Khandu chu inbiakna a neihpui tih a sawi. Centre dinna tur hian state art & culture deparment chuan ram a neih thu sawiin, he hmunah hian regional centre din a nih theih ngei a beisei tih a sawi. Khandu chu state level development committee din a, project siam thuai tuin thurawn a pe a, DPR siam chu NEZCC -in a pawmpui hnuah Ministry of Culture-ah thlen a nih tur thu a sawi a ni. Tzudir chuan NEZCC hmalaknain Arunachal-ah film and television institute din tura hmalak a nih tur thu a sawi bawk.