Assam sorkar-in APSC chairman suspend

Assam sorkar thu-chhuah chuan hna lak chungchanga thamna sum laa puh Assam Public Service Commission (APSC) chairman Rakesh Paul chu suspend a nih thu Inrinni khan a tarlang.

Raj Bhavan chuan kar kalta Zirtawpni khan President Mukherjee hnenah APSC chairman ban tur hian ngenna a lo thlen tawh a ni. Special police team-te chuan Rakesh Paul hi Dibrugarh district-ah November 4 khan an man a, hun rei tak chhung police custody-ah dah a ni. Paul bakah hian APSC member Samedur Rahman pawh man a ni tawh a, a ni bakah hian APSC-a assistant controller of examinations, Pabitra Kaibarta pawh man a lo ni tawh bawk.

Paul leh Rahman-te hi police custody-ah ni 14 chhung an awm hnuin court chuan ni 14 dang awm leh turin tunhnai khan thupek a chhuah leh a ni. November 9 khan Assam Chief Minister Sarbananda Sonowal chuan cabinet meeting koin, APSC chairman suspend a nih theih nan hian cabinet chuan Governor hnenah rawtna thlen an lo remti tawh a ni. Assam Governor Padmanabha Balakrishna Acharya chuan Paul-a ban a nih theih nan President hnenah lehkha a lo thawn tawh a, President hnen aṭanga ban tura thupek an dawn hma loh chuan suspend rih a ni dawn tih state personnel department official chuan a tarlang. Official chuan Governor hnen aṭanga Paul suspend tura hriattirna an dawn bawhzuiin, suspend a nih thu an puang tih a sawi bawk.

APSC member eng emaw zat chu Assam civil service examination hnuaia hna lak chungchangah thamna sum laa puh an ni a, he thilah hian politician challang tak tak te pawh an inrawlh nia tarlan a ni. Mawhphurtu bera ngaih APSC chairman Paul-a hian a nupui, a unaupa, a driver leh a laina hnai hmingin ram eng emaw zat a nei nia sawi a ni bawk. Gauhati High Court chuan kum 2015 khan Central Bureau of Investigation (CBI) chu Paul-a thil neih chhui chiang turin thupek a lo chhuah tawh a, CBI-te chu preliminary enquiry neih a nih chhung chu Paul-a man lo turin thu a pe bawk.

Rakesh Paul-a lakah hian Krishak Mukti Sang-ram Samiti chuan Public Interest Litigation (PIL) a thehlut a ni.

Hetih lai hian APSC-a Deputy Controller of Exa-mination Pabitra Kaibartya chu kar kalta Zirtawpni khan Special Judge Court-ah a inlan a, a thil tih dik lohte a puang niin police-te chuan an sawi. Kaibartya hi November 11 khan man a ni a, a inpuanna 'confessional statement' hi Kamrup CJMCourt-ah record a ni. Special Judge Court chuan Kaibartya hi ni 14 dang judicial custody-a awm leh turin thupek a chhuah leh nghal bawk. APSC member dang Rahman chu kar kalta Thawhlehni khan Court-ah a lo inlan tawh a, December 6-ah inlan leh tura tih a ni. Rahman-a personal security officer Mabud Ali Choudhury leh Dibrugarh Town Planning engineer Naba Kanta Patir te pawh he thilah hian man an ni tawh.