Nagaland Chief Minister : T.R Zeliang

Nagaland chief minister 10-na ni tura kum 2014-a lak luh, T. R. Zeliang hi February 21 1952 khan Peren district-a Mbau­pung­wa thingtlang khuaah a piang. Nagaland People's Front hruaitu a ni a, Zeliang hian kum 2014 khan, kha tih hunlaia Chief Minister Neiphiu Rio chu a thlak a ni. CM a nih hma hian Mem­ber of Parliament (MP) atan thlan tlin a ni a, Rajya Sabha-ah Nagaland MP niin hun eng emaw chen a awm.

Zirna lam

T. R. Zeliang hian Assam, Dibrugarh-a Don Bosco High School aṭangin High School a zo a, kum 1980 khan Kohima College aṭangin B.A. a exam a, mahse hemi ṭum hian subject eng emaw zatah a fail nia tarlan a ni. Hemi hnu hian Arts College
aṭangin a graduate. NTC chuan July 2015 khan Zeliang-a education qualification chung­changah Right to Informa­tion Act (RTI) hmangin zawhna an zawt a, chhanna
aṭanga a landan chuan Zeliang hian kum 1980 khan Roll no.598 niin Kohima College-ah B.A a exam a, English, Alt. English, Economics leh History-ahte a fail a ni. Political party ṭhen­­khat chuan Zeliang hian elec­tion affidavit-ah education qualification dik lo a hmang niin an sawi a, beih nan an hmang fo a ni. College a kal lai hian Zeliangrong Students Union-ah president nihna a chelh ṭhin a, Zeliangrong Action Committee-ah general secretary hun eng emaw chen a chelh. Hemi hnu hian Zeliangrong Youth Organisation-ah nihna pawimawh chelh chho lehin, Indian National Congress hnuaia Peren District Youth Congress-ah president a ni zui bawk.

Political career

Zeliang hian Nagaland Assem­bly election, 1982 leh 1987-ah te Tening constituency-ah a chuh a, hnehna a chang zo lo ve ve. Hemi hnu kum 1989 khan Indian National Congress ticket-in thlan tlin a ni a, a zawnin kum 1993, 1998 leh 2003-te khan a bial ngai aṭang vek hian thlan tlin leh a ni bawk. Kum 1989–90 chhungin Information leh Tourism minister a ni a, kum 1994-1998 chhung Relief & Rehabilitation minister a ni. Kum 1998 - 2003 chhung Environment and Forest bakah Geology and Mining Deparment a enkawl leh a, kum 2003 khan Indian National Congress aṭangin Zeliang leh Congress MLA paruk te chu an chhuak a, Nagaland Congress an din zui a ni.

Zeliang hi kum 2004 aṭanga 2008 chhung Rajya Sabha-ah MP-in a awm a, hemi hnu hian state politics luhchilh leh a ni. Kha tih hun laia chief minister Neiphiu Rio chuan Zeliang hi Planning, Animal Husbandry leh Parliamentary Affairs misniter atan a dah. Kum 2008 state assembly-ah chuh ve lehin Peren constituency aṭangin thlantlin niin, kum 2013 khan a bial ngaiah bawk hian thlan tlin leh a ni bawk.

Kum 2014 May 24 khan Naga­land Chief Minister 10-na ni turin rinawmna thu tiamtira lakluh a ni ta a ni.