Assam-ah nupui pakhat aia tam neih khap dawn

Assam chief minister Himanta Biswa Sarma chuan an state-ah nupui pakhat aia tam neite chu kum sarih chhung lung-in tan tir an ni dawn tih a puang.

Chief Minister hian Thawhṭanni k han zirlai hmeichhiate puala scheme duan, Mukhya Mantrir Nijut Moina scheme thawh hnihna a tlangzarhnaah an policy siam thar hi a puang tel nghal a ni. "A tawp thlengin hmeichhiate zahawmna venghim turin kan bei dawn. Nupui pakhat aia tam neih khapna dan kan siam dawn a ni," tiin Nijut Moina scheme chu naupang inneih tirna thleng ṭhin venna tur chauh ni loin, Assam-a hmeichhiate hmasawnna dal theitu hrang hrangte nuaibona tur a nih thu a sawi.

CM chuan BJP kaihhruai sorkar chuan nupui pakhat aia tam neih khapna bill hi November 25-a thlasik assembly session neih ni hmasa berah a pu lut dawn tih sawiin, nupui/pasal pakhat aia tam neih chu an sakhaw danin phalsak mah se, BJP sorkar chuan a pawm dawn lo tih a sawi. India ram state zingah Uttarakhand chu nupui pakhat aia tam neih khapna dan siam hmasa ber niin, nikum khan khapna hi a lo siam tawh a ni.

Mukhya Mantrir Nijut Moina scheme hnuaiah hian Class XII aṭanga postgraduate degree zirlai hmeichhiate hnenah thla tin puihna pek ṭhin an ni. Higher secondary zirlaite chu thla tin Rs 1,000 pek an ni a, degree zirlaite hnenah Rs 1,250 leh PG zirlaite hnenah thla tin Rs 2,500 pek an ni ṭhin. He scheme hi state chhunga zirlai hmeichhia nuai 3.5 ten an chhawr thei dawn a ni.

Assam sorkar hian naupang inneihtir tihtawp a nih theihna turin kum 2022 aṭang khan beihpui a thlak a, kum hnih chhungin naupang innneihtirna thubuaiah mi 8,000 vel man an ni tawh a ni. Kuminah ram chhunga state hrang hrang zingah naupang inneihtirna tihbo kawnga hma la ṭha ber a ni tawh a, kum 2026-ah tihbo vek tum a nih thu CM chuan a sawi.