Meghalaya: Hmeichhe naupang rukbo Delhi-ah chhanchhuak; a rubo tu man

Meghalaya-a West Garo Hills-a Rajabala khaw hmeichhe naupang, kum kal taa rukbo chu West Garo Hills police leh Delhi police ṭangkawpin an chhanchhuak tih official-ten an sawi. Hmeichhe naupang hi October 26 khan district headquarters, Tura-ah hruai kir a ni.

Hmeichhe naupang rubo tu, Atowar Hussain, Rahul tia koh Rajabala, Meghalaya khaw mi chu man nghal niin, Protection of Children from Sexual Offences (POCSO) Act hnuaiah thubuai siamsak a ni a, judicial custody-ah ni 14 chhung hren a ni ang. West Garo Hills superintendent of police Abraham T Sangma chuan agency hrang hrangte nen chhanchhuah hna hi thla eng emaw zat an thawk tih a sawi.

Sangma chuan kum kal ta chhung khan Atowar Hussain leh hmeichhe naupang awmna chin hriat tumin beihpui an thlak tih a sawi a; mahse, tun hnaiah Delhi-ah hmuh an ni tih an hriat chauh thu a sawi. Delhi police puihnain hmeichhe naupang awmna chin an hriat thu a sawi a, Zirtawpni khan Delhi-ah police team tirh an ni a, Inrinni khan Tura-ah hmeichhe naupang hi an hruai let an ni.