AASU-in Assam CM in bulah nawrh huaihawt

All Assam Students’ Union (AASU) chuan Thawhṭanni khan Dibrugarh-a chief minister Sarba­nanda Sonowal-a in bulah Citizenship (Amendment) Bill, 2016 duh lohna lantirin nawrh an huaihawt. Police-te chuan nawrh huai­hawtte lo danna tur hi an siam a, mahse zirlai pawlte hian daidanna siam an tichhe zui a ni.

CM Sonowal hi Pathianni khan a chhungte inneihna hmang turin Dibrugarh-ah hian a kal a, a awm lai chuhin AASU hian a in kawtah nawrh hi an huaihawt a ni. Zirlai pawlten nawrh an huaihawtnaa tel tur hian  district chhung hmun hrang hrang aṭangin zirlaite an kalkhawm a ni. Mahse zirlaite punkhawm hma  lawkin CM hian Asom Divas programme hmanpui turin helicopter-in Jorhat lam a pan hman a ni. 

AASU Dibrugarh district gene­ral secretary Sankar Jyoti Baruah chuan, "Sarbananda Sonowal pawh hi AASU hruaitu hlui a nihna hmang ṭangkai leh larpuiin Chief Minister a nih theih phah a, hetihlai zirlai pawlten na tak an dodal mek Citizenship (Amendment) Bill hi kalpui a tum tlat a ni," a ti. Assam mipuite phatsanah CM chu a puh a, sorkar laipui chuan Assam state chu dan loa Bangladesh mi rawn lutte dah khawmna hmuna hman a tum tih sawiin, hei hi engtikah mah an remti ngai dawn lo tih a sawi bawk. 

"CAB hi pass a nih chuan Assam mipuite chuan an nihna an hloh hlen tawh dawn a ni," tiin Baruah chuan he bill dodala Assam mipuite an inlungrual a ṭul thu a sawi.