Dec 18 aṭangin Manipur Assembly Winter Session

11th Manipur Legislative Assemby Winter Session chu De­cem­ber 18 aṭangin neih a ni dawn. 

Assembly winter session-ah thil pawimawh ngaihtuah tur zingah hian Naga peace talk leh Citizenship (Amendment) Bill te a tel. State education minister Thok­chom Radheshyam chuan an state-in an buaipui mek thil hrang hrang ngaihtuah a ni dawn tih sawiin, cabinet chuan Dzuko Valley leh Tungjoy-a Nagaland nena ramri buaina an neih mek chungchang buaipuitu tur,  public health engineering department minister L Dikho kaihhruai committee din pawh a remti tawh tih a sawi.

Minister chuan Manipur police-te hnena ration pawisa, thla khata Rs 1000 pek ṭhin chu Rs 2000-ah tihpun a nih bakah, cabinet chuan state textile policy a siam dawn tih a sawi bawk. Naga peace talk neih mekin Manipur ram chin a nghawng tel tur duh loin, Manipur-ah hian Coordinating Committee on Manipur Integrity (COCOMI), civil body leh political party hrang hrangte chuan state sorkar chuan special assembly session nei turin an lo nawr reng a ni. COCOMI bultumin state chhung hmun hrang hrangah nawrh pawh huaihawt a ni fo bawk.