Meghalaya NIT sak hna zo fel thuai dawn

Union human resources minister Ramesh Pokhriyal chuan Meghalaya-a National Institute of Technology (NIT) permanent campus sak mek chu zawh fel a ni thuai dawn tih a sawi. 

Union minister hian Thawhṭannia Lok Sabha inkhawmah Shillong Lok Sabha MP Vincent H Pala zawhna a chhannaah hei hi a sawi a ni. Sorkar laipui chuan Sohra-a NIT Meghalaya permanent campus  sakna tur hian cheng vaibel­chhe 800 a ruahman a, kum thum kal ta chhung khan cheng vaibelchhe 165.14 a pe tawh, project thawhna tur hian kum 2010-ah din niin, 2012 khan Laitumkrah-a temporary campus chu hman ṭan a ni a, permanent campus hi Shillong aṭanga km 53-a hla, Sohra-ah sak mek a ni. Tunah hian zirlai 930 an awm mek. 

NIT Meghalaya hi NIT Act 2007 (Amended 2012) hnuaia India rama NIT din 31 zinga mi a ni, a sakna senso hiunion ministry of human resource development in a tum. Union minister chuan NIT Meghalaya tan hian kum 2017-18 ah cheng vaibelchhe 70, 2018-19 ah cheng vaibelchhe 48.78 leh 2019-20 ah cheng vaibelchhe 46.36 pek a nih tih a sawi. A hmun hi Meghalaya sorkarin a pek a ni a, a sak hna hi ngawrh taka thawh mek niin zawh thuai a ni dawn tih minister chuan a sawi. 

Union minister chuan  hmar­chhak state danga NIT sakna tura sorkar laipuiin sum a pek tawh zat a sawilang bawk. Kum thum chhungin NIT Agaratala tan cheng vaibelchhe 312.3, NIT Silchar tan cheng vaibelchhe 323.19, NIT Arunachal Pradesh tan cheng vaibelchhe 101, NIT Manipur tan cheng vaibelchhe 115.14, NIT Mizoram tan cheng vaibelchhe 130.22 , NIT Nagaland tan cheng vaibelchhe 119.14 leh NIT Sikkim tan cheng vaibelchhe 128.77 a pe tawh a ni.