Assam : Sorkar hnathawk leh pensioner tan cashless healthcare tlangzarh

Assam sorkar chuan 'Ayushman Asom Mukhya Mantri Lok Sevak Arogya Yojana (AA-MMLSAY)' hnuaiah state-a hnathawkte leh pensioner-te bakah, anmahni enkawltute tan cashless medical treatment facility a tlangzarh.

Chief minister Himanta Biswa Sarma chuan he facility thar hi October 29 khan tlangzarhin, Assam-a damdawi-in hrang hrang leh ram chhung damdawi-ina a chhawr theih tura ruahman a ni. He scheme hi kum 2023-a din a ni a, reimbursement model hmang chauha kalpui a ni ṭhin.

Ruahmanna thar siam hnuaiah sorkar hnathawk leh pensioner-te chuan sum pek ngai lion inenkawlna an dawng thei tawh dawn a ni. Kalphung thar kalpui chhohnaah damlo ten harsatna an tawh lohna turin reimbursement system awmsa chu hman chhunzawm zel a ni rih dawn tih Chief Minister chuan a sawi bawk.

Scheme hnuaiah hian hnathawk mi 2,23,826 leh pensioner 6,172 an inziaklut tawh. Sorkar chuan scheme din tirh aṭangin damlo enkawlna atan hian Rs vbc 65 a seng tawh bawk a, kum khat chhunga an sum hman zat chu Rs vbc 17–18 vel a ni. Sarma chuan sorkar laipui scheme Ayushman Bharat Jan Arogya Yojana ang loin state MMLSAY chu hnathawktute thawhkhawm hmanga kalpui a nih tih a sawi. Kum lo awm zel turah a chhawr ṭangkaitu mi nuai 7-8 vel an awm thei dawn nia chhut a ni.