Manipur : Governor-in MSRLM ṭanpuina sum pek belh

Manipur governor Ajay Kumar Bhalla chuan, November 1 khan Manipur State Rural Livelihoods Mission (MSRLM) hmasawnna tur atan ṭanpuina sum pek belhin, tualchhung buaina avanga chenna in leh lo chhuahsan naupang thla kua leh a chunglam tan 'Mama's Gift' kaltlangin chaw ṭha an sem dawn bawk a ni.

Manipur-a National Health Mission (NHM)-a doctor leh nutritionist-te hnuaia din, Mama's Gigt hi Lamyanbi Village Level Federation (VLF), Khurai, MSRLM hnuaia siam a ni. He hmalakna hmang hian Imphal East, Imphal West, Bishnupur, Thoubal, Jiribam, kakching, Tengnoupal leh Kangpokpi relief camp-a naupang 1,000 chuang ṭanpui an ni tawh.

Governor chuan he hmalakna hi fakin, Mama’s Gift chu khawtlang enkawl kawnga hmasawnna chhinchhiahna a nih thu a sawi. Raj Bhavan, Imphal aṭanga chhawmdawlna an pek chu naupangte hamṭhatna tur leh inkhawngaih tawnna lantir chhunzawm zelna a nih thu a sawi bawk.

Official chuan nausen, a bik takin relief camp-a awm mekten ei tur ṭha an mamawhte an dawn theihna tura hmalak a nih thu sawiin, Rural Development leh Panchayati Raj department hnuaiah MSRLM chuan June 2023 khan 'Mama’s Gift', naupang tana ei tur pekna tur an tlangzarh thu a sawi.

State sorkar chuan Imphal valley leh tlang huam chhungah relief camp 300 chuang a sa tawh a, mi 59,000 an awm mek a ni.