Meghalaya : Sorkarin zirlai hmeichhiate tan self-defence training hawng

Meghalaya sorkar chuan, state puma zirlai naupang hmeichhiate thuam chakna leh, mahni inrintawkna an neih theihna atan self-defence taining programme a hawng. He programme hi Education, Sports leh Youth Affairs department leh Meghalaya police thawh honaa kalpui tur a ni.

Training hi sikul huam chhungah neih a ni dawn a, intructor thiam tak takten zirlaite chu mahni invenhim dan tur an zirtir dawn a ni. Social Welfare Department adviser, Paul Lyngdoh chuan hmeichhiate tana self-defence training programme an buatsaih chu hun harsa an tawh hunah an hmang ṭangkai thei dawn tih a sawi.

Sorkar chuan training bakah sikul facility tihchangtlung a tum tih a sawi bawk a, zirlai hmeichhiate tan inthiarna hmun hran leh sanitary pad a thlawna sem a ni dawn tih Lyngdoh chuan a sawi bawk.

Sikul naupangte tana self-defence training programme hi state eng emaw zatah Samagra Shiksha Abhiyan hnuaiah kalpui a lo ni tawh a, sorkar laipui sponsor scheme niin, thla thum training neih chhungin sikulah thla khatah Rs 9,000 ṭanpuina a pe ṭhin.