Assam: Zirlai naupang sikul chawlhsan zat tlahniam

2024-25-a Unified District Information System for Education Plus (UDISE+) report a lan danin, Assam-ah zirlai naupang sikul chawlhsan, dropout zat an tlahniam. Hetih rual hian sikul chawlhsan zat chu ram chhung hmun dang nen khaikhin aiin a la sang zawk thung.

Primary level-ah Assam-a zirlai sikul chawlhsan zat chu kum 2023-24-a 6.2% aṭangin kum 2024-25-ah 3.8%-ah a tlahniam a, ram pumah 2.3%-in a tlahniam a ni. Upper primary level-ah hemi hun chhung hian 8.2% aṭangin 5%-ah a tlahniam bawk. Secondary level-ah pawh dropout rate hi 25.1% aṭangin 17.5%-ah a tlahniam a ni.

2024-25 UDISE+ data-ah hian ram pumah sikul level zawng zawngah dropout chungchangah hmasawnna a awm tih hmuh theih a ni. Preparatory stage-a dropout zat chu 3.7% aṭangin 2.3%-ah a tlahniam a, middle stage-ah 5.2% aṭangin 3.5%-ah tlahniamin, secondary level-ah 10.9% aṭangin 8.2%-ah a tlahniam bawk.

Assam-ah dropout zat tlahniam zel mah se, ram pum huap nena tehkhinin a la inthlau a, hei vang hian theihtawp chhuah chhunzawm zel a la ngai ti mi thiamte chuan an sawi.