Meghalaya: CM-in Mission Clean Shillong hawng

Meghalaya chief minister Conrad K. Sangma chuan State Convention Centre-ah Rangbah Shnong leh Greater Shillong Planning Area-a tualchhung hruaitute nen consultative meeting neiin, Mission Clean Shillong 2027 a hawng.

Meeting-a thu a sawiah, CM Sangma chuan an thil tum ber chu thil ṭha lo tarlan mai ni loin, thil ṭha zawk siam tura thawh hona pawimawhzia lantir a ni, a ti. Khawtlang mipui, sorkar, official-te, leh politics hruaitute inkarah thawh hona ṭha a awm chuan tih theih loh a awm lo tih a sawi. Khawtlang hruaitute nen inbiakna neih tam chu sorkarin a hmalakna tihhlawhtlin a tum zia lantirtu a ni, a ti.

Mission Clean Shillong 2027 chuan thil tum lian tak neiin, chung zingah chuan bawlhhlawh sawngbawlna 100%-a tihhlawhtlin, Marten landfill aṭanga bawlhhlawh paih chhuah, bawlhhlawh awm lohna hmun siam, leh technology hmanga monitoring system hmante a tel.

He mission hnuaia hmalakna turah hian state hmun hrang hranga CCTV dah, street light tihchangtlung, tui luankawr tihfai leh khawpui cheimawite pawh a tel. CM chuan Shillong khawpui chhunga hmun 48-ah CCTV 250 dah a ni dawn tih sawiin, November thla tawpah zawhfel a ni dawn tih a sawi bawk. Hmun 14 cheimawina tur project senso tur fund a sem chhuak bawk.